புத்தாண்டு பலன்கள் – 2011
https://www.dinamani.com/edition/astview.aspx?sid=newyear&ast=11
கும்பம் :
நாளை முதல், ஏப்ரல் மாதம் வரை உள்ள காலகட்டத்தில் உங்கள் உழைப்பிற்குத் தகுந்த நற்பலன்களை நிறைவாகப் பெறுவீர்கள். உங்களின் தன்னம்பிக்கை அதிகரிக்கும். நண்பர்களுடன் சேர்ந்து செய்யும் கூட்டு முயற்சிகளால் லாபம் பெருகும். ‘ஷேர் மார்க்கெட்’ போன்ற ‘ஸ்பெகுலேஷன்’ துறைகளில் ஈடுபட்டும் வருமானத்தைக் காண்பீர்கள். உயர் பதவிகளில் இருப்பவர்களின் நட்பு கிடைக்கும். உற்றார், உறவினர்களின் ஆதரவு நன்றாக இருக்கும். குடும்பத்தில் மகிழ்ச்சி நிலவும். எதிர்பாராத வகையில் திருமணம் போன்ற சுப காரியங்கள் நடக்கும். பாகப் பிரிவினைகள் சுமுகமாக முடிந்து உங்களுக்குரிய நியாயமான பங்கு கிடைக்கும்.
இந்தக் காலகட்டத்தில் கேது பகவான், உங்களை உதாசீனப்படுத்துபவர்களிடம் சண்டை போடத் தூண்டுவார். ஆனாலும் விட்டுக் கொடுத்து நடந்துகொண்டு அவர்களின் ஆதரவைப் பெற முயலுங்கள். ‘எல்லார்க்கும் நன்றாம் பணிதல்’ என்ற வள்ளுவர் வாக்கை மறவாதீர்கள். விற்க முடியாமல் உங்களைத் தவிக்க வைத்த சொத்துக்களை இந்தக் காலகட்டத்தில் விற்றுவிடுவீர்கள்.
ராகு பகவான் உங்களைத் தொலைதூரப் பயணங்களை மேற்கொள்ளச் செய்வார். உங்களுக்கு விருப்பமில்லாதவர்களுக்கு உதவி செய்யும்படியான சூழ்நிலையும் உருவாகும். அதேசமயம் உங்களின் கொள்கைகளுக்காக எதையும் விட்டுக் கொடுக்க மாட்டீர்கள். மூத்த சகோதர, சகோதரிகளை அனுசரித்து நடந்துகொண்டால் அவர்களின் மூலம் சில நன்மைகளைப் பெறலாம்.
இந்த ஆண்டு மே மாதம் முதல், டிசம்பர் மாதம் வரையில் உள்ள கால கட்டத்தில் உங்களுடைய கடவுள் பக்தி அதிகரிக்கும். ஆலய உழவாரப் பணிகளில் ஈடுபடுவீர்கள். தேவையற்ற வேலைகளில் இருந்து ஒதுங்கிக் கொள்வீர்கள். சில முயற்சிகளை சகோதர, சகோதரிகளையும் இணைத்துக்கொண்டு செய்தால் நலம் உண்டாகும். பழைய கனவுகளை நினைவாக்கத் தேவையான முயற்சிகளைச் செய்வீர்கள்.
ராகு பகவான், உங்களின் கொள்கைப் பிடிப்புகளை சிறிது தளர்த்திக் கொள்ளச் செய்வார். எனவே செய்தொழிலில் எடுக்கும் முடிவுகளை ஒரு முறைக்குப் பலமுறை யோசித்து எடுப்பது நல்லது.
கேது பகவான், உங்களின் சுக சௌகர்யங்களை அதிகப்படுத்துவார். குல தெய்வப் பூஜைகளைச் செய்து மன நிம்மதியடைவீர்கள். விருந்து, கேளிக்கைகளில் கலந்து கொண்டு மகிழ்வீர்கள். நண்பர்களும், குடும்பத்தினரும் உங்களை அனுசரித்து நடந்து கொள்வார்கள். உங்களை சந்தேகக் கண்ணுடன் முன்பு பார்த்தவர்கள், தற்போது உங்களைப் புரிந்து கொள்வார்கள். அதேநேரம் உங்களின் எண்ணங்களை உறவினர்களிடம் வெளிப்படுத்துவதில் எச்சரிக்கையுடன் இருக்கவும்.
உத்யோகஸ்தர்களுக்கு எதிர்பார்த்த ஊதிய உயர்வு கிடைக்கும். அலுவலகத்தில் சிறு இடையூறுகள் தோன்றினாலும் திட்டமிட்ட வேலைகள் அனைத்தும் வெற்றிகரமாக முடியும். பணியில், எதிர்பார்த்த நிம்மதி ஏற்படும். மேலதிகாரிகள் உங்கள் நலனில் அக்கறை செலுத்துவார்கள். சிலருக்கு அலுவலக விஷயமாக வெளியூர் செல்வதற்கான வாய்ப்பு ஏற்படும். சக ஊழியர்களுக்குத் தக்க நேரத்தில் உதவிகளைச் செய்வீர்கள்.
வியாபாரிகளைத் தேடிப் பல வகையிலும் லாபம் வரும். வியாபாரத்தில் இருந்த முட்டுக் கட்டைகள் சிதறும். கொடுக்கல், வாங்கல் விஷயங்கள் சிறப்பாகவே முடியும். சரக்குகளை விற்பதிலேயே கவனம் செலுத்தி உங்களின் திறமையை வெளிப்படுத்துவீர்கள். வாடிக்கையாளர்களைக் கவரும்வண்ணம் திட்டங்களைத் தீட்டுவீர்கள்.
விவசாயிகளுக்கு விளைச்சல் நன்றாக இருக்கும். மாற்றுப் பயிர்களைப் பயிரிட்டு வருமானத்தைக் கூட்டிக் கொள்ளவும். உங்கள் பணியாளர்களும் உங்களுக்கு உதவிகரமாக இருப்பார்கள். இல்லத்தில் சுப காரியங்களை நடத்துவீர்கள். புதிய குத்தகைகளை எடுப்பீர்கள். அதேநேரம் வீண் சஞ்சலங்களைத் தவிர்க்கவும்.
அரசியல்வாதிகளைத் தேடிப் புதிய பொறுப்புகள் வந்து சேரும். அதேசமயம் முக்கியப் பிரச்சினைகளில் வாயைக் கொடுத்து மாட்டிக் கொள்ள வேண்டாம். தொண்டர்களின் ஆதரவு நன்றாக இருப்பதால் உங்களுடைய பணிகளில் தொய்வு ஏற்படாது. அரசு அதிகாரிகள் உங்களுக்கு உதவிகரமாக இருப்பார்கள். கவனத்துடன் செயல்பட்டு கட்சி மேலிடத்தின் பாராட்டுகளைப் பெறுவீர்கள்.
கலைத்துறையினர், பொருளாதார ரீதியில் முன்னேற்றமடைவதற்கான அறிகுறிகளைக் காண்பீர்கள். உங்கள் திறமைக்குச் சவால்கள் ஏற்படும். எனவே தீவிர யோசனைகளுக்குப் பிறகே புதிய ஒப்பந்தங்களில் கையெழுத்திடவும். முக்கிய முடிவுகளை எடுக்கும் முன் உங்கள் நலம் விரும்பிகளிடம் ஆலோசனை பெறவும். மற்றபடி ரசிகர்களின் ஆதரவு சிறப்பாகத் தொடரும்.
பெண்மணிகள் இல்லத்தில் நிம்மதியைக் காண்பீர்கள். கணவரிடம் ஒற்றுமையாக இருப்பீர்கள். சரளமான பண வரவால் ஆடை, ஆபரணங்களை வாங்கி மகிழ்வீர்கள். குடும்பத்தில் சுப நிகழ்ச்சிகள் நடக்கும். குழந்தைகளுடன் விருந்து, கேளிக்கைகளில் கலந்துகொண்டு உற்சாகம் அடைவீர்கள்.
மாணவமணிகள் படிப்பில் கூடுதலான மதிப்பெண்களைப் பெறுவீர்கள். உங்களின் கோரிக்கைகள் அனைத்தும் பெற்றோர்களால் நிறைவேறும். வருங்காலத்திற்காக செய்யும் பயிற்சிகள் அனைத்தும் வெற்றிகரமாக முடியும்.
பரிகாரம்: ‘நமசிவாய’ என்று காலையிலும் மாலையிலும் 108 முறையாவது ஜபித்து, மனதை உற்சாகத்துடன் வைத்துக் கொள்ளவும்.
